वसन्त ऋतुमा सगरमाथा चढ्न ५२ जनाले लिए आरोहण अनुमति, ११ जना महिला

काठमाडौं । वसन्त ऋतुमा सगरमाथा चढ्न भन्दै आइतबारसम्म ५२ जनाले आरोहण अनुमति लिएका छन् । आइतबारसम्म ४ समूहका ५२ आरोहीले सगरमाथा आरोहण अनुमति लिएको पर्यटन विभागले जानकारि दिएको हो ।

सगरमाथा चढ्न अनुमति पाउनेमा ११ महिला रहेका छन् । आइतबारसम्म कुल १३ समूहका १ सय १४ जनाले विभिन्न हिमाल आरोहण अनुमति पाएका छन् । तीमध्ये सबैभन्दा धेरै सगरमाथाका लागि अनुमति पाउनेहरु छन् । दोस्रो स्थानमा रहेको अन्नपूर्ण प्रथम हिमालका लागि दुई समूहका २४ जनाले आरोहण अनुमति पाएका छन् । अमादब्लम हिमालमा ३ समूहका २३ जना, पुथा हिउँचुलीका लागि सात, हिँउचुली पाँच, काङ्ग्री शार दुई र जुगल हिमालका लागि एकले आरोहण अनुमति लिएको विभागले जानकारि दिएको छ ।

बुधबारसम्म जारी अनुमतिबाट ८ करोड ३९ लाख ९२ हजार ५० रुपैयाँ रोयल्टी संकलन भएको पर्यटन विभागले जानकारि दिएको छ । आरोहण अनुमति लिनेहरु अझ बढ्ने बताइएको छ ।