न्यु साउथ वेल्स राज्यमा शनिबार थपिए ३२१ कोरोना संक्रमित,भिक्टोरियामा समेत उच्च बन्दै संक्रमण

ब्रिजबेन, अष्ट्रेलिया । न्यु साउथ वेल्समा शनिबार उच्च रेकर्ड बनाउनेगरि कोरोना संक्रमित थपिएका छन् । न्यु साउथ वेल्स सरकारले शनिबार सार्वजनिक गरेको तथ्यांक अनुसार १ लाख ८ हजार ४४९ परीक्षणबाट ३२१ जना कोरोना संक्रमित थपिएका हुन् ।

थपिएका संक्रमित मध्ये २ जना बाहिरी र ३१९ जना स्थानीय व्यक्तिहरू रहेको स्वास्थ्य विभागले जानकारी दिएको छ । सिड्नीको लकडाउन सातौँ हप्तामा प्रवेश गर्नै लाग्दा बढेको कोरोना संक्रमणलाई स्वास्थ्य विभागले थप जटिल अवस्थाको रुपमा औँल्याएको छ । पछिल्लो २४ घण्टामा न्यु साउथ वेल्समा ५ जनाको कोरोना संक्रमणबाट मृत्यु भएको छ । यसले पनि संक्रमण र जोखिम बढेको संकेत गरेको छ ।

यता, भिक्टोरिया राज्यमा पनि कोरोना संक्रमितको संख्या बढ्दो क्रममा देखिएको छ । शनिबार मात्रै भिक्टोरियामा २९ जना नयाँ कोरोना संक्रमित थपिएका छन् । यहाँको स्वास्थ्य विभागले पनि संक्रमणले थप जोखिमको संकेत गरेको जनाएको छ ।

पछिल्लो समय ब्रिजबेन, सिड्नी र मेलबर्नमा कोरोना संक्रमण बढेसँगै लकडाउन गरिएको छ भने बाँकी राज्यमा जनजीवन सामान्य छ । तास्मानिया र क्यानवेरा कोरोना संक्रमणका कारण बन्दाबन्दी गर्नुपर्ने अवस्थामा नपुगेपनि बाँकी ६ वटा राज्यले कोरोना नियन्त्रणका लागि यसअघि लकडाउन गर्नुपरेको छ ।