भिक्टोरियामा उच्च रेकर्ड बनाउँदै थपिए कोरोना संक्रमित, न्यु साउथ वेल्समा ५८१ जना !

ब्रिजबेन,अष्ट्रेलिया । बन्दाबन्दी जारी रहेको भिक्टोरियामा पछिल्लो समय कोरोना संक्रमणदर उच्च हुन थालेको छ । पछिल्लो २४ घण्टामा गरिएको ७३ हजार ४४३ जनाको पीसीआर परीक्षणबाट १ हजार ९६५ जनामा कोरोना संक्रमण पुष्टि भएको हो ।

भिक्टोरियामा पछिल्लो २४ घण्टामा पहिचान भएका कोरोना संक्रमितको यो नै उच्च रेकर्ड हो । गएको २४ घण्टामा भिक्टोरियामा कोरोना संक्रमणबाट थप ५ जनाको मृत्यु समेत भएको छ ।

यता, कोरोना संक्रमण घट्दै गएको न्यु साउथ वेल्समा पछिल्लो २४ घण्टामा ५८१ जनामा कोरोना संक्रमण पुष्टि भएको छ । २४ घण्टामा गरिएको ७९ हजार ८९४ परीक्षणमा यी व्यक्तिमा कोरोना संक्रमण पुष्टि भएको स्वास्थ्य विभागले जानकारी दिएको हो ।

न्यु साउथ वेल्समा पछिल्लो २४ घण्टामा थप ११ जनाले ज्यान गुमाएका छन् । अष्ट्रेलियाका यी दुई राज्यमा लामो समयदेखी बन्दाबन्दीको नियम लागू गरिएपनि कोरोना संक्रमण नियन्त्रणमा आउन सकेको छैन ।