भ्रमण वर्ष २०२० सफल पार्न लेवर सांसद लिण्डा बर्नी नेपाल घुम्न जाने

सिड्नी

नजिकिदो संघिय निर्वाचनमा नेपालीमूलका नागरिकको मत आफुतिर तान्न अष्ट्रेलियाका नेताहरुले विभिन्न आकर्षक घोषणाहरु गर्ने क्रम बढेको छ ।

यसैबिच लेवर पार्टीकी सांसद तथा उमेद्वार लिन्डा बर्नीले सन् २०२० मा नेपाल भ्रमण गर्ने घोषणा गर्नु भएको छ ।

शनिवार रकडेलमा मल्टिकल्चरल कम्युनिटिज काउन्सिल अफ न्यु साउथ वेल्स (एमसिसि) ले गरेको कार्यक्रममा लेवर उमेद्वार लिण्डाले नेपालको भौगोलिक सुन्दरता र पर्यटनका संभावनाका बारेमा खुलेर प्रसंसा गर्नुभयो । विभिन्न देशका प्रतिनिधीहरु सहभागि कार्यक्रममा नेपाली युवा मोहन भट्टले नेपाल र अष्ट्रेलियाको कुटनीतिक सम्बन्ध पुरानो भएपनि दुइ देशबिच उच्चस्तरिय राजनैतिक भ्रमण हुन नसकेको गुनासो गर्नुभएको थियो ।

त्यहि गुनासोलाई सम्बोधन गर्दै लिण्डाले केही वर्षदेखि आफु नेपाल भ्रमणमा जाने तयारी गरिहेको बताउनुभएको हो ।

चुनावी सरगर्मी बढेसंगै नेपाली लगायत बार्टन क्षेत्रका बहुसांस्कृतिक समुदायले लिण्डा बर्नीसंग अन्तरक्रिया गरि आ आफ्नो समस्या राखेका हुन् । अन्तरक्रियामा लिण्डाले आफु आदिवासी भएर आफ्नो भाषा बोल्न नसक्दा दुख लाग्ने गरेको बताउनुभयो ।

त्यसैले आफ्नो चुनावी क्षेत्रमा बसोबास गर्ने नेपाली समुदायको भाषा संस्कृति संरक्षणका लागि महत्वपूर्ण रहेको सामुदायिक भवन निर्माणमा सहयोग गर्न आफु र आफ्नो पार्टी तयार रहेको समेत दावी गर्नुभयो ।

त्यस्तै आफुले जिते अभिभावक भिषा प्रकृया सहज बनाउने तथा केही समयदेखि रोकिएको नागरिकता आवेदन प्रकृया पुन सुचारु गर्ने सम्मको प्रतिवद्धता जनाउनुभयो ।

कार्यक्रममा नेपाली, भारतिय, चिनिया, मोरिसस लगायत पृष्ठभूमीका स्थानिय नागरिकहरुको सहभागिता थियो ।