ब्रिजबेनको सवारी साधन मर्मतसम्भार व्यवसायमाथी ३० हजार डलर जरिवाना !

ब्रिजबेन । अष्ट्रेलियाको ब्रिजबेनस्थित सवारी साधन मर्मतसम्भार व्यवसायका अपरेटरलाई ३० हजार डलर जरिवाना तिराइएको छ । कम्पनीले पूर्ण–समय मोटर मेकानिकको रूपमा काम गरेका भारतीय नागरिकलाई कानुन अनुसारको सेवा सुविधा नदिएको गुनासोसँगै फेयरवर्क अम्बुडस्म्यानले संघीय अदालतमा चलाएको मुद्धाका आधारमा जरिवाना गराइएको हो ।

अदालतले कम्पनीलाई कानुन कार्यान्वयन गराउन आदेश समेत दिएको छ । कामदारलाई पूर्ण फिर्ता भुक्तानी, सेवानिवृत्तिमा ब्याज समेत थपेर भुक्तानी दिन समेत आदेशमा भनिएको छ । फेयरवर्क अम्बुडस्म्यान सान्ड्रा पार्करले कानुन कार्यान्वयन नगर्ने व्यवसाय अपरेटरहरूलाई सचेत गराउँदै कामदारमाथी ठगी नगर्न चेतावनी दिनुभएको छ । कामदार ठगिएको गुनासो आएमा कानुनी कारबाहीका लागि प्रतिबद्ध रहेको समेत फेयरवर्क अम्बुडस्म्यानले जनाएको छ ।

स्वदेशी तथा आप्रवासी कामदारहरू जो कोहीलाई तलब सेवा सुविधा लगायतमा कानुनी सहयोग गरिने पार्करले बताउनुभएको छ । आफ्नो तलब वा अधिकारको बारेमा कुनै पनि कर्मचारीहरूले निःशुल्क सल्लाह र सहायताको लागि सम्पर्क गर्न फेयरवर्क अम्बुडस्म्यानले सबैलाई आह्वान समेत गरेको छ ।