हेलिकप्टर दुर्घटनाप्रति दुख व्यक्त गर्दै सरकारले गठन गर्यो छानबिन समिति

काठमाडौं। मनाङ एयरको हेलिकप्टर दुर्घटनाप्रति दुख व्यक्त गर्दै सरकारले छानबिन गर्न समिति गठन गरेको छ । मंगलबार अपराह्न सिंहदरबारस्थित प्रधानमन्त्री तथा मन्त्रिपरिषद् कार्यालयमा बसेको मन्त्रिपरिषद् बैठकले घटनाबारे दुःख व्यक्त गर्दै पर्यटन मन्त्रालयका सहसचिव बुद्धिसागर लामिछानेको नेतृत्वमा छानबिन समिति गठन गरेको हो ।

मनाङ एयरको हेलिकप्टर दुर्घटना परेर ज्यान गुमाएका सबै मृतकप्रति मन्त्रिपरिषद् बैठकले श्रद्धाञ्जली अर्पण गरेको सञ्चार तथा सूचना प्रविधि मन्त्री एवं नेपाल सरकारकी प्रवक्ता रेखा शर्माले जानकारी दिनुभयो । मंगलबार बिहान हेलिकप्टर दुर्घटनामा परेर कास्कीको रुपा गाउँपालिका स्थायी घर भएका क्याप्टेन चेतबहादुर गुरुङसहित ५ जना मेक्सिकोका नागरिकले ज्यान गुमाएका थिए ।

दुर्घटनापछि छानविन वा जाँचबुझ आयोग, समिति बन्ने तर उनीहरुले दिने प्रतिवेदनका सुझाब कार्यान्वयन नहुने गरेको भन्दै सरकारमाथी नै प्रश्न उठ्ने गरेको छ । समिति बनाएर अध्ययनका नाममा लाखौँ खर्च गर्ने सरकार विज्ञको सुझाब कार्यान्वयन गरेर उड्डयन क्षेत्रलाई सुरक्षित बनाउनतर्फ गम्भिर बन्नुपर्ने आवज उठेको छ ।