नक्कली कागजपत्र बनाएर भिजिट भिसामा विदेश पठाउने गिरोहका ३२ जना प्रहरी फन्दामा

ट्राभल एजेन्सी सञ्चालक, सरकारी कर्मचारीदेखि प्रहरीसम्मको गिरोह !
काठमाडौं । नक्कली कागजपत्र बनाएर भिजिट भिसामा विदेश पठाउने गिरोहका ३२ जना नेपाल प्रहरीको फन्दामा परेका छन् । नेपाल प्रहरीको काठमाडौं उपत्यका अपराध अनुसन्धान कार्यालयले अहिलेसम्म ट्राभल एजेन्सी सञ्चालक र सरकारी कर्मचारीसहित ३२ जनालाई नियन्त्रणमा लिएको हो ।

गत असोज १९ गतेदेखि हालसम्म नक्कली कागजपत्र बनाएर भिजिट भिसामा विदेश पठाउने गिरोहका ३२ जनालाई पक्राउ गरी आवश्यक कारबाही प्रक्रिया अगाडि बढाइएको काठमाडौं उपत्यका अपराध अनुसन्धान कार्यालयका प्रहरी वरिष्ठ उपरीक्षक सोमेन्द्र सिंह राठौरले जानकारी दिनुभएको छ । बुधबार मात्रै थप ३ जनालाई नियन्त्रणमा लिई अनुसन्धान गरिरहेको राठौरले बताउनुभयो । नक्कली कागजात मार्फत विदेश पठाउने यो प्रकरणमा पक्राउ परेकामध्ये कन्सल्टेन्सी सञ्चालक ६ जना, प्रहरी १ जना, पूर्वप्रहरी १ जना, एयरलाइन्सका २ जना र अन्य विभिन्न सेटिङमा संलग्न व्यक्तिहरु ११ जना रहेका छन् ।

प्रहरीले थप संलग्नताको खोजी जारी राखेको छ । प्रहरीको प्रारम्भिक अनुसन्धान बाट कागजात मिलाए बापत ट्राभल एजेन्सीहरुले प्रतिव्यक्ति १५ हजार रुपैयाँ लिने गरेको र अध्यागमन विभागका कर्मचारीहरुले नयाँको हकमा ५५ हजार र पुरानो (एकपटक विदेश पुगेर फर्किएका)हरुको हकमा ४० हजार रुपैयाँ लिने गरेको खुलेको छ ।