वित्तीय संस्थाको सहभागिता विनै ऋण लेनदेन गर्न मिल्ने अनलाइन प्लेटफर्मको तयारीमा नेपाल राष्ट्र बैंक

काठमाडौं । बैंक तथा वित्तीय संस्थाको सहभागिता विना नै ऋण लेनदेन गर्न मिल्ने गरी अनलाइन प्लेटफर्मको तयारीमा नेपाल राष्ट्र बैंक जुटेको छ । केन्द्रीय बैंकले वित्तीय मध्यस्थतामा लाग्ने खर्च कटौती गर्ने तथा प्रविधिमा आधारित विश्वको पछिल्लो अभ्यासलाई अनुशरण गर्दै  पियर–टु–पियर अर्थात् पीटुपी प्लेटफर्म सञ्चालन गर्ने तयारी राष्ट्र बैंकले थालेको हो ।

दुईभन्दा बढी ऋणीले कुनै एक व्यक्तिलाई ऋण दिन सक्ने गरी पियर–टु–पियर अर्थात् पीटुपी प्लेटफर्म सञ्चालन गर्न सकिने राष्ट्र बैंकको अध्ययनले देखाएसँगै तयारी  थालिएको बताइएको छ । यो अवधारणाअन्तर्गत व्यक्ति–व्यक्ति अनलाइन प्लेटफर्ममार्फत जोडिने र उनीहरूले त्यसमार्फत ऋण दिने र लिने काम गर्नसक्नेछन् । यसमा लगानी गर्न चाहने र लगानी लिन चाहनेबीचको समझदारीका आधारमा लेनदेन हुनेछ । केन्द्रीय बैंकको आर्थिक अनुसन्धान विभागले गरेको अध्ययनअनुसार पहिलो चरणमा साना कर्जा लेनदेन हुने गरी प्लेटफर्मको लाइसेन्स दिन सकिने गृहकार्य भैरहेको छ । व्यक्तिगत रूपमा ऋण दिन र लिन चाहने दुवै व्यक्तिले यो माध्यममा एकाउन्ट खोल्न सक्नेछन् ।

लगानीका अरु क्षेत्रमा कम प्रतिफल दिने अवस्था र बैंकमा निक्षेपको ब्याजदरसमेत कम रहेको अवस्थामा पैसा हुनेले यस्तो माध्यम प्रयोग गरी ऋणमा लगाउन सक्ने विश्वास गरिएको छ । पियर–टु–पियर अर्थात् पीटुपी प्लेटफर्म मार्फत होल्ड भएर बस्ने स-सानो पुँजी समेत परिचालन हुने सम्भावना अधिक रहेको छ ।