काठमाडौंको सितापाइलामा एकै परिवारका तीन जना मृत फेला, अनुसन्धान गर्दै प्रहरी

काठमाडौं । काठमाडौंको सितापाइलामा एकै परिवारका तीन जना मृत फेला परेका छन् । ३८ वर्षीया महिला तथा उनका ८ र २ वर्षीया छोरीहरु घरको कोठाभित्र मृत फेला परेको जिल्ला प्रहरी परिसर काठमाडौंका एसपी नवराज अधिकारीले जानकारि दिनुभएको हो ।

एसपी अधिकारीले घरको कोठाभित्र तीन वटा शव फेला परेको जानकारी पाएपछि घटनास्थल पुगेर अनुसन्धान सुरु गरिएको जानकारी दिनुभयो । घटनाको स्थलगत अवस्थाको प्रारम्भिक विश्लेषणपछि प्रहरीले उनीहरुको हत्या भएको आशंका गरेको छ । घटनास्थलमा जिल्ला प्रहरी परिसर काठमाडौंका अधिकारीहरुसँगै उपत्यका अपराध अनुसन्धान कार्यालयको टोली समेत पुगेर अनुसन्धान गरिरहेकाले अनुसन्धानबाट थप तथ्य खुल्ने बताइएको छ ।

मृतक महिलाका श्रीमान समेत रुखमा झुण्डिएको अवस्थामा मृत भेटिए
सितापाइलामा मृत फेला परेकी महिलाका श्रीमान पनि झुण्डिएको अवस्थामा मृत फेला परेका छन् । सोलुखुम्बुका रामप्रसाद सुनार घरभन्दा केही पर जंगलमा झुण्डिएको अवस्थामा फेला परेको काठमाडौं प्रहरी परिसरका एसएसपी भुपेन्द्र खत्रीले जानकारी दिनुभयो । उनका श्रीमती र दुई छोरीहरु कोठाभित्रै मृत फेला परेका थिए ।

श्रीमति, दुई छोरीको हत्या गरेपछि सुनुवारले आत्महत्या गरेको प्रारम्भिव निष्कर्ष निकालेको छ । सामान्य ज्याला मजदुरी गरेर जीवन गुजारा गर्ने परिवारमा भएको यो विभत्स घटना बारे थप अनुसन्धान भैरहेको छ ।