रुसी सेनामा कार्यरत नेपालीको जीवन रक्षाको माग गर्दा १४ जना प्रहरी नियन्त्रणमा

काठमाडौं । रुसी सेनामा कार्यरत नेपालीको जीवन रक्षाको माग गर्दै सिंहदरबार अगाडि प्रदर्शन गर्दा १४ जनालाई प्रहरीले नियन्त्रणमा लिएको छ । रुसी सेनामा रहेका नागरिकको जीवन रक्षाको लागि आन्दोलनतर सचेतना अभियानकी अभियन्ता कृतु भण्डारी सहित आन्दोलनमा उत्रिएका १४ जनालाई प्रहरीले नियन्त्रणमा लिएको हो ।

रुसी सेनामा गएर सम्पर्कविहीन भएकाहरुको खोजी, मृत्यु भएकाहरुको शव फिर्ता र अलपत्र परेकाहरुको उद्धारको माग राख्दै युवाहरुले सिंहदरको दक्षिण गेट अगाडि प्रदर्शन गरेका थिए । उनीहरुले आन्दोलनका क्रममा सरकारको ध्यानाकर्षणका लागि विभिन्न मागसहितका प्ले कार्ड समेत प्रदर्शन गरेका थिए । रुसी सेनामा भर्ती भई युक्रेनसँग युद्ध गरेर ज्यान गुमाउने नेपालीको संख्या ३३ पुगेको छ ।

सरकारलाई खबरदारी गर्न भन्दै गरिएको आन्दोलनमा रुसी सेनामा संलग्न भएर ज्यान गुमाएकाहरुको परिवार र जोखिम मोलेर रुसी सेनामा रहेकाहरुको परिवारका सदस्यहरु समेत सहभागि भएका थिए ।