धनगढी उपमहानगरपालिकाका मेयर हमाल थप उपचारका लागि भारतको नयाँ दिल्लीमा

काठमाडौं । कैलालीस्थित धनगढी उपमहानगरपालिकाका मेयर गोपाल हमाललाई थप उपचारको लागि भारतको नयाँ दिल्ली लगिएको छ । शुक्रबार मस्तिष्कको नसामा समस्या देखिएपछि माया मेट्रो अस्पतालको आईसीयूमा राखेर उपचार अघि बढाइएका मेयर हमाललाई थप उपचारका लागि दिल्ली रेफर गरिएको हो ।

माया मेट्रो अस्पतालको आईसीयूमा राखेर हमालको न्यूरो डाक्टर हरि पौडेलको टीमले उपचार गरिरहेको थियो । स्वास्थ्यमा सुधार नभएपछि शनिबार दिल्ली रेफर गरिएको अस्पतालले जानकारि गराएको छ । माया मेट्रो अस्पतालले उपचारमा सक्दो प्रयास गर्दा पनि स्वास्थ्यमा सुधार नभएपछि दिल्ली रेफर गर्नुपरेको जनाएको छ । दिल्लीमा अहिले मेयर हमालको थप उपचार सुरु भएको जनाइएको छ ।

धनगढी उपमहानगरपालिकाका मेयर हमाललाई सवतन्त्र उम्मेदवारका रुपमा गएको स्थानीय तह निर्वाचनमा निर्वाचित हुनुभएको थियो । उहाँ कम बोल्ने आफ्नो स्थानीय तह र नगरवासीका पक्षमा बढी काम गर्ने मेयरका रुपमा लोकप्रिय हुनुहुन्छ । स्वतन्त्र उम्मेदवार बन्नुपूर्व उहाँ विवेकशिल साझाको राजनीतिमा हुनुहुन्थ्यो ।