कांग्रेसले आज जनकपुरधामबाट चुनावी प्रतिज्ञापत्र सार्वजनिक गर्दै

काठमाडौं । नेपाली कांग्रेसले आज फागुन २१ को निर्वाचनलाई लक्षित गरेर तयार पारेको चुनावी प्रतिज्ञापत्र जनकपुरधामबाट सार्वजनिक गर्दैछ ।

कांग्रेसले मधेशकेन्द्रित आम सभा आयोजना गरेर आज चुनावी प्रतिज्ञापत्र सार्वजनिक गर्न लागेको हो । कांग्रेस मधेश प्रदेश सभापति समेत रहनुभएका मधेशका मुख्यमन्त्री कृष्णप्रसाद यादवले कम्तीमा एक लाख जनसहभागिता हुनेगरि कार्यक्रमको व्यवस्थापन गरिएको जानकारि दिनुभएको छ । सभामा पार्टी सभापति गगन थापासहित शीर्ष नेतृत्वको उपस्थिति रहनेछ ।

कांग्रेस केन्द्रीय नेतृत्वको सहभागिताले मधेशमा कांग्रेसको चुनावी अभियानलाई थप गति दिने अपेक्षा गरिएको छ । कांग्रेसले घोषणापत्रमा मधेशको समग्र आर्थिक–सामाजिक रूपान्तरणलाई प्राथमिकतामा राखेको छ । रोजगारी सिर्जना, कृषि आधुनिकीकरण, सिँचाइ तथा भण्डारण पूर्वाधार विस्तार, शिक्षा–स्वास्थ्य सेवाको गुणस्तर सुधार, सडक तथा अन्य संरचना निर्माण, लगानीमैत्री वातावरण र सुशासन जस्ता विषय घोषणा पत्रका मुख्य एजेन्डा बनाइएको बताइएको छ ।

कांग्रेसको सभास्थल आसपास सुरक्षा व्यवस्था कडा पारिएको छ । बाहिरी जिल्लाबाट आउने सहभागीका लागि यातायात तथा अन्य व्यवस्थापन समेत गरिएको छ ।