अष्ट्रेलियामा २५ वर्षीय नेपाली युवकलाई पित्तनलीको क्यान्सर, ज्यान बचाइदिन अपिल

ब्रिजवेन/सरल गुरुङ

अष्ट्रेलियाको ब्रिजवेनमा श्रीमती पढाउन संघर्ष गरिरहेका एक नेपाली युवकलाई पित्तनलीको क्यान्सर भएको छ । नेपालगन्ज स्थाई घर भएका २५ वर्षीय विशाल पौडेललाई गत मे १२ तारिखमा क्यान्सर भएको पुष्टी भएको हो । उनको हाल व्रिजवेनस्थित आरबि डब्लु एच अस्पतालमा उपचार भइरहेको छ । एक्कासी आखा र पिसाबमा पहेलो देखिएपछि जचाउनका लागि विशाल श्रीमतिसंगै अस्पताल पुगेका थिए । चिकित्सकले विभिन्न परिक्षण गरेर एकसाता पछि पित्तनलीको क्यान्सर भएको पत्ता लगाएका थिए । विशाल सन् २०१७ मा श्रीमतीलाई नर्सिङ पढाउन डिपेन्डेन्ट भिषामा अष्ट्रेलिया आएका थिए । काम गर्दै व्रिजवेनको नेपाली समाजमा सेवा गर्न तथा यहाको भलिवल खेलमा विशालले योगदान दिदै आएका छन् ।

उनको केही दिन अघि अप्रेसन गरेर पित्तनलीमा जमेको रगत सफा गरिएको छ । जटिल स्थानमा क्यान्सर देखिएकाले उपचार गर्न हिचकिचाएका चिकित्सकले विशाललाई घर फर्कन सुझाव दिएका छन् । विद्यार्थी भिषामा रहेका विशाल अहिले जीवन र मरणको दोसादमा छन् । यहा उपचार संभव नहुने भएपछि गैर आवासिय नेपाली संघ कुइन्सल्याण्डको सक्रियतामा विशालको उपचार भारत लगेर गरिने तयारी भएको छ । यसअघि पनि व्रिजवेनकै नेपाली युवक उज्जवल पौडेलको क्यान्सरको उपचार भारतमा भएको र अर्जुन तिमिल्सिना पनि क्यान्सरको उपचारका लागि भारत उड्न लागेकोले विशालको पनि उपचार संभव हुने देखिएको छ ।

क्यान्सर निको भएका उज्जवल पौडेलेले यसअघि आफ्नो उपचार भएको नया दिल्लीस्थित विएलके अस्पतालका चिकित्सक राय माग्दा विशालको पनि उपचार संभव भएको जवाफ आएपछि एनआरएनए कुइन्सल्याण्डले यसमा पहल सुरु गरेको हो । विशालको उपचारका लागि झण्डै १ लाख ६० हजार अष्ट्रेलियन डरल खर्च लाग्ने अस्पतालले जानकारी पठाएको एनआरएनए कुइन्सल्याण्डका संयोजक उमेश खड्काले जानकारी दिनुभयो । विशालको उपचारमा सहयोग गर्न एनआरएनएले गो फन्ड मि मार्फत सहयोग संकलन सुरु गरेको छ । विशालको नियमित सम्पर्कमा रहेका एनआरएनएका पदाधिकारीहरुले सहयोगका लागि कुइन्सल्याण्डका नेपाली व्यापारी र सामाजिक संघसंस्थाका पदाधिकारीहरुसंग पनि हात फिजाएको छ । उनीहरुबाट सहयोगको प्रतिवद्धता आएको खड्काले जानकारी दिनुभयो । खड्काले एक नेपाली युवाको ज्यान बचाउन सबैले सकेको सहयोग गर्न अपिल समेत गर्नुभयो ।

विशाल बचाउ अभियानमा साथ दिन यो लिंकमा थिच्नुहोस् ।

त्यस्तै एसियुमा नर्सिङ पढिरहेकी विशालकी श्रीमति एलिशा अधिकारीले पनि सबै मिलेर आफ्नो श्रीमान् ज्यान जोगाइदिन अपिल गर्नुभएको छ । ‘हामी मध्यम वर्गिय परिवार हौ, छाका काटेर अध्ययन पुरा गरि देश र समाजको लागि केही गरौ भन्ने सोच थियो’ -एलिशाले भन्नुभयो-‘ तर, दैवको लिला यो कलिलै उमेरमा मेरी श्रीमान् जीवन र मरणको लडाईमा हुनुहुन्छ । तपाईहरुको सानो सहयोगले मेरो सिउदो उजाडिनबाट रोकिन सक्छ । कृपया सकेको सहयोग गरिदिनुहोला ।’ 
त्यस्तै विशालले पनि आफुले हरेश नखाएको भन्दै सबैको साथ पाए आफु बाचेर समाजसेवामा फर्किने बाचा गरेका छन् ।

यसअघि ब्लड क्यान्सर भएका अर्जुन तिमिल्सिना बचाउन एनआरएनए कुइन्सल्याण्डले सुरु गरेको गो फन्ड मि अभियानमा अष्ट्रेलिया र विश्वभरका नेपालीले १ लाख १७ हजार डलर सहयोग गरेका छन् । त्यहि सहयोगपछि अर्जुन मे २३ तारिखमा उपचारका लागि भारतको नया दिल्ली स्थित बिएलके अस्पताल जादै छन् । तिमिल्सिनालाई भारतमा उपचारका लागि पठाउन क्यानवेरास्थित नेपाली दूतावासले महत्वपुर्ण भूमिका खेलेकाे छ । विशाललाई पनि काेराेनाकै बिचमा भारत पठाउन प्रकृया सुरु गरिसकेकाे राजदूत महेशराज दाहालले बताउनुभयाे । विशाललाई एकसाताभित्रै भारत पठाउनुपर्ने अवस्था छ । सबै मिलेर सहयोग गरे अर्जुनलाई जस्तै विशाललाई पनि उपचारका लागि भारत पठाउन सकिने संयोजक उमेश खड्काले बताउनुभयो ।