भिडियो कन्फ्रेन्समार्फत राजदूत दाहालले बुझाए न्यूजिल्याण्डलाई ओहोदाको प्रमाणपत्र

सरल गुरुङ, क्यानबेरा । अष्ट्रेलियाका लागि नेपाली राजदूत महेशराज दाहालले भिडियो कन्फ्रेन्सिंगमार्फत न्यूजिल्याण्डको लागि नेपाली राजदूतको रुपमा आफ्नो ओहोदाको प्रमाणपत्र बुझाएका छन् । क्यानबेरास्थित नेपाली नियोगबाटै राजदूत दाहालले न्यूजिल्याण्डकि गभर्नर जनरल पास्टी रेड्डी समक्ष आफ्नो ओहोदाको प्रमाणपत्र बुझाएका हुन् ।

नेपाल सरकारले दिएको जिम्मेवारी अनुसार राजदूत दाहाल न्यूजिल्याण्डका लागि गैरआवासीय नेपाली दूत हुन् । कोरोना संक्रमणका कारण गत मार्चमा तय भएको ओहोदाको प्रमाणपत्र बुझाउने कार्यक्रम स्थागित हुँदै आएको थियो ।

न्यूजिल्याण्डबाट भिडियो कन्फ्रेन्समार्फत बुझाउन सकिने जानकारी आएपछि मंगलबार राजदूत दाहालले कार्यालयमै बसेर ओहोदाको प्रमाण पत्र बुझाउनुभयो । भिडियो कन्फ्रेन्समार्फत ओहोदाको प्रमाण पत्र बुझाइएको सम्भवतः कुटनीतिक क्षेत्रमै यो पहिलो पटक हो । प्रत्यक्ष बसेर दुई देशको सम्बन्धका विषयमा चर्चा गर्न पाइने भएपनि कार्यालय बाटै प्रमाणपत्र बुझाएको अनुभवलाई राजदूत दाहालले अनौँठो मौकाका रुपमा लिनुभएको छ ।

भिडियो कन्फ्रेन्समा राजदूत दाहालले नेपालकी राष्ट्रपति विद्यादेवी भण्डारी, प्रधानमन्त्री केपी शर्मा ओली तथा नेपाली जनताको तर्फबाट न्यूजिल्याण्डकी गभर्नर, त्यहाँको सरकार र जनतालाई शुभकामना दिनुभयो । न्यूजिल्याण्ड सरकारले कोरोना भाईरस संक्रमण रोकथाममा खेलेको भूमिका र पाएको सफलता बारे समेत चर्चा भएको थियो । नेपाली समूदाय र नेपाली विद्यार्थीलाई कठीन परिस्थितिमा उपलब्ध गराएको सहायताका लागि न्यूजिल्याण्डकि गभर्नर जनरल पास्टी रेड्डी मार्फत राजदूत दाहालले कृतज्ञता प्रकट गर्नुभयो । दुईदेशको सम्बन्धलाई नेपालले उच्च महत्व दिएको भन्दै राजदूत दाहालले कोरोना महामारी साम्य भएसँगै सम्बन्धलाई थप परिस्कृत गरिने विश्वास व्यक्त गर्नुभयो ।

न्यूजिल्याण्डकी गभर्नर जनरल रेड्डीले कार्यकाल सफलताको शुभकामना दिँदै नेपालको राष्ट्रपति, प्रधानमन्त्री र जनतालाई शुभकामना व्यक्त गर्नुभयो । ओहोदाको प्रमाणपत्र बुझाउने कार्यक्रममा सैनिक टुकडीले सलामी दिने लगायतका कार्यक्रमको विशेष महत्व रहनेभएपनि भिडियो कन्फ्रेन्समार्फत ओहोदाको प्रमाण पत्र बुझाउँदा राजदूत दाहालले यो मौका गुमाउनु परेको छ । नेपाल र न्यूजिल्याण्डबीच सन् १९६१ देखि दौत्य सम्बन्ध कायम रहदै आएको छ ।