अष्ट्रेलियाबाट फर्किए १ हजार ८३ नेपाली । अर्को उडान कहिले

सरल गुरुङ/ब्रिजवेन, अगष्ट ६ तारिखमा अष्ट्रेलियाबाट २ सय ९८ जना नेपाली स्वदेश फर्किएका छन् । सिंगापुर एयरको विमान चढेर नेपालीहरु राति साढे ९ बजे सिड्नीबाट सिंगापुर हुदै नेपाल फर्किएका हुन् ।

स्थानिय समय अनुसार आज दिउसो १२ बजे र १ बजे उनीहरु काठमाडौ उत्रिदै छन् । सिड्नीबाट एउटै ठुलो विमानमा गएपनि सिंगापुरबाट भने दुइ साना जहाजमा उनीहरुलाई काठमाडौ लगिन लागिएको हो । खासगरी छोराछोरी भेट्न आएका अभिभावकहरु कोरानोका कारण सिमा बन्द हुदा यत्तै अड्किएका थिए । यता अड्किएका झण्डै १३ सय नेपालीले स्वदेश फर्कन पाउ भन्दै दूतावासमा निवेदन दिएका थिए । उनीहरुमध्ये हालसम्म १ हजार ८३ जना स्वदेश फर्किएका हुन् ।

यस्तो छ उडान शिलशिला

अष्ट्रेलियाका नागरिक लिएर तीन पटकसम्म नेपाल एयरलाइन्सको विमान अष्ट्रेलिया आएपनि ती विमानहरु रित्तै फर्किएपछि यहाँ फसिरहेका नेपाली नागरिकको पनि उद्दार गनुपर्ने दवाव सृजना भएको थियो । ती विमानमा यताबाट नेपाली फर्काउन नेपाली दूतावास र राजदूत महेश दाहालले गर्दै आएको प्रयास पटक पटक असफल हुदै आएको थियो । व्यापक जनदवाव सृजना भएपछि नेपाल सरकारले आफ्ना नागरिक उद्दार गर्ने देशहरुको सूचीमा अष्ट्रेलिया पनि पार्यो । त्यसको केही सातामा नेपाल सरकार र दुतावासले अष्ट्रेलियाबाट नेपाली उद्दार गर्न सुरु गर्यो । सुरुका दुइ उडान नेपाल एयर लाइन्सको विमानबाट भएको थियो । सरकारकै पहलमा भएको उक्त उडानमा भाडा निकै महंगो भएको भन्दै विरोध भएपछि दूतावासले गैर आवासिय नेपाली संघसंग मिलेर सस्तो भाडाको विमान खोज्ने प्रयास सुरु गरेको हो ।

त्यहि प्रयासको क्रममा नेपाली दूतावास क्यानवेराको पहलमा गैरआवासिय नेपाली संघ, अष्ट्रेलियाका नेपाली संस्थाहरुको छाता संगठन फेन्का, चिकित्सकहरुको संस्था एम्डा र पत्रकारहरुको संस्था एन्जासहितको उद्दार समिति गठन भयो । त्यहि समितिले सार्वजनिक सुचना जारी इच्छुक ट्राभल एजेन्सी खोजी गर्यो । जसमा नेपाल र अष्ट्रेलियाका १२ ट्राभल एजेन्सीले आवेदन दिए । जसमध्ये ६ वटाले मिलेर उडान गर्ने सहमति जनाएका थिए । तर, पछि ट्राभल एजेन्सीहरु मिल्न सकेनन् र उनीहरुले छुट्टा छुट्टै चाटर्ड गरे । छुट्टा छुट्टै रुपमा ट्राभल एजेन्सीले उडान व्यवस्थापन गरेपनि भाडा दर भने यसअघि नेपाल सरकारले व्यवस्थापन गरेको भन्दा निकै सस्तो पर्यो ।

जुन २३ –नेपाल एयरलाइन्सको चाटर्ड विमानले सिड्नीबाट काठमाडौका लागि उडान भरेको थियो । जसमा कोरोनाका कारण अष्ट्रेलियामा रोकिएका २५७ जना नेपाली स्वदेश फर्किएका थिए । यो उडानको भाडा १६ सय ५० अमेरिकी डलर थियो । यो विमान उडानको व्यवस्थापन नेपाल सरकार, दूतावास र नेपाल एयरले मिलाएको थियो ।

जुन २७- नेपाल एयरलाइन्सकै अर्को चाटर्ड विमानले मेलवर्नबाट काठमाडौका लागि उद्दार उडान भरेको थियो । यो अष्ट्रेलियाबाट भएको दोस्रो उद्दार उडान हो । यसमा २०९ जना नेपाली स्वदेश फर्किएका थिए । यो उडानको प्रतिव्यक्ति भाडादर पनि १६५० अमेरिकी डलर नै थियो । यो विमान उडानको व्यवस्थापन नेपाल सरकार, दूतावास र नेपाल एयरले मिलाएको थियो ।

जुलाई १४ – सिंगापुर एयरमार्फत सेमि चाटर्ड विमानबाट १ सय ४९ जना नेपाली अष्ट्रेलियाबाट स्वदेश फर्किएका हुन् । दूतावासको संयोजनमा गैरआवासिय नेपाली संघ अष्ट्रेलियाले खुल्ला प्रतिष्प्रधामार्फत ट्राभल एजेन्सीहरु छनोट गरि सस्तो दरमा उडानको व्यवस्था गरेको हो । अष्ट्रेलियाको सिड्नी, मेलवर्न र ब्रिजवेनबाट नियमित उडान मार्फत सिंगापुर पुगेका नेपालीलाई त्यहाबाट विमान चाटर्ड गरेर स्वदेश फर्काइएको हो । ६ वटा ट्राभल एजेन्सीलाई संयुक्त रुपमा व्यवस्थापन गर्ने जिम्मा दिएपनि टिकट काट्ने काम भने सिड्नीको एभरेष्ट ट्राभल्सलाई दिइएको थियो । विमानको व्यवस्थापन गरेबापत २५ डलर सेवाशुल्क सबै ट्राभल एजेन्सीलाई बराबर बाड्ने सहमति भएको थियो ।

जुलाई ३०- सुमेघ ट्राभलको व्यवस्थापनमा मालिन्डो एयरमार्फत सिड्नीबाट १ सय ६० जना नेपाली स्वदेश फर्किएका हु्न् । भाडा ११ सय २० अमेरिकी डलर तोकिएको थियो ।

अगष्ट ६ –एभरेष्ट ट्राभल र दा भिन्ची ट्राभलले संयुक्त रुपमा उडानको व्यवस्थापन गरेको हो । सिड्नीबाट २९८ जना एउटै विमानमा सिंगापुर पुगेर त्यहाबाट दुइ विमानमा बाडिएर नेपालीहरु स्वदेश फर्किएका हुन् । यो उडानको भाडा १६२५ अष्ट्रेलियन डलर तोकिएको छ ।

टिमवर्कले संभव भयो

छोटो समयमै तीन वटा विमान चाटर्ड गरेर नेपालीलाई स्वदेश फर्काउनु त्यत्ति सजिलो कार्य थिएन । नेपाल र अष्ट्रेलियाबिच सिधा हवाई उडान नहुनु र दुबै देश कोरोनाको संकटसंग जुधिरहेकाले पनि यो कार्य थप जटिल बनेको थियो । तर, यो विषम परिस्थितीमा पनि समुदाय मिल्दा उद्दार उडान संभव भएको एनआरएनए अध्यक्ष तथा उद्दार समितिका संयोजक केशव कँडेलले बताउनुभयो ।
‘यो विषय हाम्रा लागि पनि नौलो थियो, त्यहि माथी कोरोनाको कहरका बिचमा विमान चाटर्ड गरेर उद्दार गर्नु निकै चुनौतिपूर्ण थियो’- कँडेलले भन्नुभयो- ‘तर, नेपाल सरकार, दूतावास, सामाजिक संघसंस्था, पत्रकार र समुदायले साथ दिदा उडान संभव भएको हो ।’

पहिलो विमान चाटर्ड गर्दा सुरुमै ५६ हजार डलर विमान कम्पनीलाई तिर्नुपर्ने र स्वदेश फर्कने यात्रुहरुको संख्या पनि एकिन नभएकाले पैसा डुब्ने हो कि भन्ने चिन्ता पनि थियो कँडेलले भन्नुभयो ।  मिलेर काम गर्दा प्रतिकुल अवस्था पनि सफलता पाइदो रहेछ भन्ने पाठ सिकेको कँडेलको दाबी छ । सस्तो दरमा विमान चाटर्ड गरि नेपालीलाई स्वदेश फर्काउने कार्यमा लाग्ने सबैलाई कँडेलले धन्यवाद समेत दिनुभएको छ ।

अर्को उडान कहिले 

हालसम्म अष्ट्रेलियाबाट ५ वटा उडान भएको छ । जसमा पहिलो दुइ वटा नेपाल सरकारले र बाकी तीन वटा एनआरएनएको नेतृत्वमा अष्ट्रेलियामा गठन भएको उद्दार समितिल व्यवस्थापन गरेका हुन् । राजदूतावासमा भरेको विवरण अुनसार अझै पनि २ देखि ३ सय नेपाली अष्ट्रेलियामै अड्किएका छन् । उनीहरुलाई स्वदेश फर्काउन अर्को उडान कहिले हुन्छ त ? भन्ने प्रश्न अहिले उठ्न थालेको छ ।
एनआरएनए अष्ट्रेलियाका प्रवक्ता नन्द गुरुङका अनुसार अगष्ट ६ तारिखपछि अर्को विमान कहिले चाटर्ड गर्ने भन्ने टुंगो लागेको छैन । संभवत एनआरएनएको पहलमा अब उडान नहुने पनि गुरुङको भनाई थियो । तर, निजी कम्पनीहरुले भने उडान गर्न सक्ने उहाँको भनाई थियो । तर, यात्रुहरुको माग आएमा थप उडान गर्न पनि एनआरएनए सकारात्मक रहेको अध्यक्ष कँडेलको भनाई छ ।
त्यस्तै यसअघि डलरको भाउका कारणले यात्रुले केही रकम धेरै तिरेका थिए । धेरै भएको रकम एक साताभित्र यात्रुलाई फिर्ता गरिसक्ने समेत क“डेलको भनाई छ ।