दशैमा समेत पाएनन फ्रन्टलाइनमा खटिएका सुरक्षाकर्मीले प्रोत्साहन भत्ता, सरकार भन्छ ‘स्रोत अभाव’

काठमाडौं । कोरोना (कोभिड–१९) भाइरसको महामारी नियन्त्रणका लागि फ्रन्टलाइनमा खटिएका सुरक्षाकर्मीले अहिलेसम्म प्रोत्साहन भत्ता पाउन सकेका छैनन । मन्त्रिपरिषद्को चैत १६ मा बसेको बैठकले दैनिक ३ सय रुपैयाँदेखि शतप्रतिशतसम्म भत्ता दिने निर्णय गरेको ७ महिना वितिसक्दा समेत सुरक्षाकर्मीले सरकारी घोषणा अनुसारको भत्ता पाउन नसकेका हुन् ।

सुरक्षा सम्बद्ध अधिकृतहरु दसैंको मुखमा सरकारले नै कबोल गरेको भत्ता नपाउँदा सुरक्षाकर्मीको मनोबल गिरेको बताउँन थालेका छन् । नेपाल प्रहरीका प्रवक्ता एसएसपी कुवेर कडायतले समेत हालसम्म सरकारी प्रतिबद्धता अनुसार सुरक्षाकर्मीलाई भत्ता बापतको रकम नआएको दिनुभयो । कोरोना महामारि नियन्त्रणमा खटिएका नेपाली सेना र सशस्त्र प्रहरी बलका कर्मचारीले पनि प्रोत्साहन भत्ता वापतको रकम पाउन सकेका छैनन् । महामारीका बेला अग्रपङ्तिमा खटिएका सुरक्षाकर्मीलाई कोरोना भत्ता दिन आनाकानी गरिरहेका बेला सांसदहरुलाई दसैं भत्ता दिइएपछि चौतर्फी आलोचना भएको थियो । अहिले आधिकांश सांसदले भत्ता कोरोना कोषमा राख्ने घोषणा गरेका छन् । व्यापक विरोधपछि सत्तारुढ नेपाल कम्युनिष्ट पार्टी (नेकपा), नेपाली कांग्रेस लगायतले भत्ता नलिने घोषणा गर्नुपरेको थियो ।

स्रोत अभावले दिन सकेनौँ–अर्थ मन्त्रालय
अर्थ मन्त्रालयले भने स्रोत अभावका कारण भत्ता दिन नसकिएको जानकारी दिएको छ । प्रवक्ता उत्तरकुमार खत्रीले भने प्रोत्साहन भत्ता किन आएन भन्ने जवाफ आफूसँग नभएको बताउनुभएको छ । अनौपचारिक कुराकानीका क्रममा मन्त्रालयका अधिकारीहरुले सुरक्षा निकायबाट अपेक्षा गरिएभन्दा धेरै संख्यामा प्रस्ताव आएपछि भत्ता व्यवस्थापनमा समस्या भएको बताएका छन् ।

प्रस्ताव अर्थमा पठाएको दाबी गर्ने गृह मन्त्रालयले नेपाल प्रहरीले ५१ हजार बढी सुरक्षाकर्मीका लागि एक अर्ब ३४ करोड रुपैयाँ, सशस्त्र प्रहरीले असारसम्मका लागि एक अर्ब रकम माग गरेको जानकारी दिएको छ । नेपाली सेनाबाट भने ८ हजारभन्दा बढी अधिकारीका लागि कोरोनासम्बन्धी प्रोत्साहन भत्ता माग गर्दै रक्षा मन्त्रालयमा प्रस्ताव पेश भएको छ । रक्षा मन्त्रालयका अनुसार जंगीअड्डाले ११ चैतदेखि २६ असारसम्मको भत्ताका लागि ७३ करोड ४४ लाख ८३ हजार रुपैयाँ माग गरेको छ ।

यस्तो थियो भत्ताका लागि सरकारी घोषणा
– मन्त्रिपरिषद्को निर्णयमा अग्रपंक्तिमा रहेर पर्सनल प्रोटेक्टिभ इक्यूपमेन्ट (पीपीई) लगाई संक्रमित, आशंकित र क्वारेन्टाइनमा राख्ने व्यक्तिलाई समातेर ल्याउने र अस्पतालमा खटिने सुरक्षाकर्मीलाई शतप्रतिशत भत्ता दिने भनिएको छ ।

– दोस्रो पंक्तिमा रहेर संक्रमित, आइसोलेसनमा रहेका र आशंका गरिएका विरामीको सुरक्षार्थ खटिएका र पीपीई लगाउन नपर्नेका लागि ५० प्रतिशत भत्ता दिने भनिएको छ ।

– लकडाउन र सामाजिक दूरी कायम गर्न खटिने सुरक्षाकर्मीलाई दैनिक ३ सय रुपैयाँ प्रोत्साहन भत्ता दिने भनिएको छ ।