तास्मानियाकी मन्त्रीको आग्रह नेपालीका सबै संस्था मिलेर आए सरकारले सहयोग गर्ने

होबार्ट/तास्मानियाकी एक मन्त्रीले नेपालीका संघसंस्थाहरु एकजुट भएर माग गर्न नसक्दा सरकारलाई सहयोग गर्न अप्ठ्यारो परेको बताउनुभएको छ । नेपालीहरुसंगको भेटका क्रममा तास्मानिया सरकारको न्याय, कार्यस्थल सुरक्षा, उपभोक्ता मामिला तथा कला मन्त्री एलिस आचरले बहुसांस्कृतिक समुदायका लागि सरकारले थुपै अनुदान दिने गरेपनि ती समुदायका संघसंस्थाहरु एकजुट हुन नसक्दा अनुदान लिने कार्य नै प्रभावित हुने गरेको बताउनुभएको हो ।

तास्मानिया सरकारको महान्यायधिवक्ता समेत रहनु भएकी मन्त्री आचरलाई नेपाली सोसाइटी अफ तास्मानियाका पदाधिकारीले बिहिबार भेट गरेका हुन् । भेटका क्रममा मन्त्री आचरले नेपाली पाठशाला, साना व्यवसाय तथा नव आप्रवासीका लागि सहयोग गर्ने प्रतिवद्धता समेत जनाउनु भएको सोसाइटीका अध्यक्ष खगेन्द्र सत्यालले जानकारी दिनुभयो । त्यस्तै भेटका क्रममा मन्त्री आचारले नेपाली समुदायलाई कोरोना खोप बारे जनचेतना जगाउन समेत आग्रह गर्नुभएको थियो । सोसाइटीले होबार्टमा अक्टोबर ९ र १० तारिखमा दशै फुटवल कपको आयोजना गर्दैछ । त्यहि कपका लागि अतिथीका रुपमा निम्तो दिन सोसाइटीका पदाधिकारीहरु मन्त्री आचरलाई भेट्न पुगेका हुन् । निम्तो दिन अध्यक्ष सत्यालसंग उपाध्यक्ष मेघना रावत, सचिव बसन्त घिमिरे र सदस्यहरु विष्णु सापकोटा र गायत्री पाण्डे पनि पुग्नुभएको थियो ।