प्रदर्शनबीच मोदीको घोषणा- प्रश्नपत्र चुहावटका मुद्दा चलाउन फास्ट ट्र्याक अदालत गठन गर्ने

भारतको राजधानी नयाँ दिल्लीमा विद्यार्थीहरूको तीव्र प्रदर्शनबीच प्रधानमन्त्री नरेन्द्र मोदीले प्रश्नपत्र चुहावटका मुद्दाको सुनुवाइका लागि फास्ट ट्र्याक अदालत गठन गर्ने घोषणा गरेका छन्।

बिहीबार बिहान सामाजिक सञ्जाल एक्समा सरकारको धारणा सार्वजनिक गर्दै मोदीले उक्त कुरा बताएका हुन्।

प्रश्नपत्र चुहावटमा संलग्नलाई छिटो र कडा सजाय सुनिश्चित गर्न फास्ट ट्र्याक अदालत स्थापना गर्ने निर्णय गरिएको उनको भनाइ छ।

‘यस सम्बन्धमा आवश्यक सबै कदम चाल्न मैले सम्बन्धित निकाय र अधिकारीहरूलाई निर्देशन दिएको छु,’ उनले लेखेका छन्।

मोदीका अनुसार प्रश्नपत्र चुहावटमा संलग्नलाई न्यायको कठघरामा उभ्याउन सरकारले चालेका विभिन्न कदममध्ये फास्ट-ट्र्याक अदालत गठन पनि एक हो।

‘हाम्रा युवाहरूको कल्याण र भविष्यभन्दा महत्त्वपूर्ण अरू केही छैन। विद्यार्थीहरूको भविष्यमाथि आघात पुर्‍याउने प्रयास गर्ने कसैलाई पनि छोडिने छैन,’ उनले लेखेका छन्।