वैदेशिक रोजगारीका क्रममा ज्यान गुमाएकाको बीमा रकम झ्वाम पार्ने ७ जनाको गिरोह पक्राउ !

काठमाडौं । वैदेशिक रोजगारीका क्रममा विदेश र छुट्टीका क्रममा नेपाल अएको समयमा मृत्यु भएका नेपालीले प्राप्त गर्ने बीमा रकम दिलाइदिन्छु भन्दै ठगी गर्ने गिरोहलाई प्रहरीले पक्राउ गरेको छ । गोप्य जानकारि र उजूरीका आधारमा काठमाडौं उपत्यका अपराध अनुसन्धान कार्यालय, मीनभवनको टोलीले बैदेशिक रोजगार बोर्डका नायब सुब्बासहितका ७ जनालाई पक्राउ गरेको हो ।

पक्राउ अभियुक्तको साथबाट विदेशमा ज्यान गुमाएका व्यक्तिहरुको नागरिकता, राहदानी, जन्म, विवाह र मृत्यु दर्ता, वडा कार्यालयको सिफारिस लगायतका कागजात बरामद भएको उपत्यका अपराध अनुसन्धान कार्यालयका सूचना अधिकृत एसपी रवीन्द्र रेग्मीले जानकारि दिनुभयो । वैदेशिक रोजगारीको सिलसिलामा विदेशमा मृत्यु भएका र बिदामा आउँदा मृत्यु भएका नेपालीहरुले प्राप्त गर्ने बीमाको रकम दिलाइदिन्छु भनेर मृतकका आफन्तलाई यो गिरोहले ठगी गर्ने गरेको बारे प्रहरीले अनुसन्धान अघि बढाएको छ ।