सार्वजनिक यातायातमा काम गर्ने ११ लाख मजदुर बेरोजगार

काठमाडौं– नेपालमा लकडाउनपछि यातायात क्षेत्रमा काम गर्ने ११ लाख मजदुर बेरोजगार बनेका छन् । झन्डै चार महिना खाली बसेका श्रमिकहरु यातायात क्षेत्र नखुल्दा बेरोजगार बनेका हुन् ।

दैनिक मजदुरी गरेर छाकटार्ने चालक, सहचालक सबैभन्दा बढी पिडित बनेका छन् । सरकारले लकडाउनको मोेडल परिवर्तन गर्दै सरकारी र निजी सवारीसाधन भने सञ्चालन गरेको छ । तर, सार्वजनिक यातायात चल्न दिने सम्बन्धमा सरकारले कुनै निर्णय गरेको छैन ।

बुधबार मजदुर र सार्वजिक यातायातका अभियन्ताहरुले सार्वजनिक यातायातका साधन सञ्चालन नभए आन्दोलनमा उत्रिने चेतावनी सरोकारवाला निकायलाई दिएका छन् ।

प्रतिनिधिसभाको विकास तथा प्रविधि समितिको बैठकमा यस विषयमा छलफल भएपनि यसको टुंगो निस्किएन । नेकपा सांसद कमला रोकाले सार्वजनिक यातायात सञ्चालन नहुँदा सबैभन्दा धेरै दुःख सर्वसाधारणले पाएको भन्दै यसर्फ सरकारले सोच्नुपर्ने बताइन् ।

लामो समय सार्वजनिक यातायात बन्द गर्दा त्यसले गरिब र गरिखानेलाई ठूलो असर परेको नेपाल यातायात स्वतन्त्र मजदुर संगठनका अध्यक्ष भीमज्वाला राईले बताए । उनले भने, ‘यसको निष्कर्ष तत्काल खोज्नुपर्छ, यातायात मजदुर भोकभोकै भए,’ उनले भने । उनले सार्वजनिक यातायात सञ्चालन गरेर केही समय नयाँ भाडादर निर्धारण गर्नुपर्ने जानकारी दिए । विद्यार्थी र बृद्धबृद्धालाई दिँदै आएको भाडा छुट पनि रोक्नुपर्ने उनको भनाई छ ।

सरकारले कोरोना महामारी नियन्त्रणका लागि चैत ११ गते लकडाउन गरेदेखि सार्वजनिक यातायात ठप्प छन् । सबै सवारीसाधन ग्यारेजमा थन्किएका छन् । केही मजदुरहरु ग्यारेजमै थन्किएको सवारीसाधनमै बस्दै आइरहेको छन् ।