फिर्ता पठाइयो संसदको नयाँ लोगो, सुनको खर्च कस्ले व्यहोर्ने भन्नेमा बिवाद

काठमाडौं,संघीय संसदको लोगोमा राखिएको नक्सा नमिलेको र भद्दा देखिएको भन्दै संसद सचिवालयले निर्माणकर्तालाई नै फिर्ता पठाएको छ ।

फेरि निर्माण गरेर दिन भन्दै सचिवालयले लोगो फिर्ता गरेको जानकारी दिएको छ । संघीय संसद्का दुवै सदनका सदस्यहरूका लागि भन्दै ३ सय ५० लोगोहरू निर्माण गरिएपनि सांसदहरूले नै आपत्ति जनाएपछि निर्माणकर्ता वाग्मती प्रदेश सरकार मातहतको घरेलु तथा साना उद्योग कार्यालयलाई फिर्ता दिइएको हो । लोगोमा राखिएको सुन पुनः प्रयोगमा नआउने भन्दै त्यसको खर्च कसले बेहोर्ने भन्नेमा संसद् सचिवालय र निर्माण पक्ष बीच विवाद देखिएको छ । सांसदहरूलाई बुझाइएका लोगोहरू फिर्ता मागेर निर्माणकर्तालाई नै दिने र सुधार गराउने बारे सभामुख अग्निप्रसाद सापकोटा, संसदका महासचिव भरतराज गौतम, सचिवहरू र अन्य अधिकारीले घरेलु तथा साना उद्योग कार्यालयलका अधिकारीसँग छलफल गरेका थिए । प्रत्येक लोगोमा २ लाल सुन गरेर ८७ ग्राम सुनको खर्च ६ लाख ८२ हजार रुपैयाँ लागेको संसद सचिवालयले जनाएको छ । १ तोला चाँदीको बेस राखिएको लोगोको खर्च प्रतिलोगो ५ हजार ५ सय २७ रुपैयाँ लागेको थियो । संसद् सचिवालयले भने आफूहरूले सुन र चाँदी खरिद गरेर दिइसकेकाले डिजाइनअनुसार लोगो निर्माण गरेर दिन भन्दै अब सुनको खर्च नबेहोर्ने बताउँदै आएको छ । भारतद्वारा अतिक्रमित कालापानी, लिपुलेक र लिम्पियाधुरा क्षेत्र नेपालको नक्सामा समावेश गरेर सरकारले जेठ ७ गते नक्सा अद्यावधिक गरेको थियो ।

जेठ ११ गते बसेको प्रतिनिधिसभा र राष्ट्रिय सभा कार्यव्यवस्था परामर्श समितिको बैठकले संघीय सांसदहरूले प्रयोग गर्दै आएको लोगो नेपालको वास्तविक सीमाअनुरुपको नक्साअनुसार परिमार्जन गर्ने निर्णय गरेसँगै संसद सचिवालयले काम अघि बढाएको थियो । लोगोका डिजाइन कलाकार टेकवीर मुखिया हुन् । उनले समेत निर्माण भएको लोगोमा असन्तुष्टि जनाएका छन् । रफ लोगो नै छानेर अन्तिम रूप दिएको उनले बताए । साउन ३२ गते सार्वजनिक गरिएको नयाँ लोगो बारे सांसदहरूका साथै सामाजिक संजाल प्रयोगकर्ताले नक्सा नमिलेको, झण्डा नमिलेको, भद्दा देखिएको र रङ नमिलेको भन्दै चर्को आलोचना गरेका थिए ।