ई–सेवामा बोनस रकम पाइन्छ भन्दै प्रलोभनमा पारेर ठगी गर्ने दुई जना पक्राउ

काठमाडौं । ई–सेवामा बोनस रकम प्राप्त हुन्छ भन्दै ठगी गरेको अभियोगमा दुई जना पक्राउ परेका छन् । नेपाल प्रहरीको महानगरीय अपराध महाशाखाले ई–सेवामा ५० हजार जम्मा गरेमा दुई हजार पाँच सय रुपैयाँ बोनस पाइन्छ भन्दै रकम जम्मा गर्न लगाइ ठगी गर्ने रौतहटको माधवनारायण नगरपालिका–२ का शुभम साह र बाराको गढिमाई नगरपालिका–१० का सर्फराज आलमलाई पक्राउ गरेको हो ।

पक्राउ परेका साह र आलमले विभिन्न व्यक्तिलाई ई–सेवामा पैसा हाल्न लगाई सात लाख २७ हजार रुपैयाँ ठगी गरेको प्रहरी अनुसन्धानबाट खुलेको छ । पक्राउ परेका दुवै जनालाई आवश्यक अनुसन्धान तथा कारबाहीका लागि महानगरीय प्रहरी परिसर काठमाण्डौ पठाइएको महाशाखाले जानकारि दिएको छ । प्रहरीले बोनस वा कमिसनको प्रलोभनमा नपार्न सबैलाई सचेत समेत गराएको छ ।